Mauri Oho

Mauri Oho (ko te whakaohooho i ngā pūmanawa me te mauri o te tamaiti). E kawea ana te kaupapa nei e Kia Ata Mai me Ngā Kura ā-Iwi o Aotearoa, ā, nā te Kāwana te pūtea whakahaere. He tirohanga Māori tō te hōtaka nei e aro pū atu ana ki ngā ākonga kei ngā taumata paetae o Manawa Āki me Manawa Taki ka tohua e Ngā Whanaketanga Rumaki Māori.

He hōtaka ā-ipurangi, he hōtaka  reo rua hoki a Mauri Oho e aro pū ana ki ngā kahatanga, ki ngā pūmanawa, ki ngā kōingo, ki ngā āhuatanga ako o te tamaiti kia hāngai ai ngā akoranga māna ake, kia whakatutukihia  ōna matea ako reo matatini, pāngarau hoki. He mea tautoko te hōtaka nei i ngā mahi e whakahaerehia kētia ana i te akomanga.

Kua waihangahia te hōtaka o Mauri Oho kia hāngai pū mā ia tamaiti, ka mutu, kua whai wāhi atu te tamaiti ki ngā whakaritenga o tāna ake hōtaka. Mā te whakamahi īpapa te tamaiti e uru ai ki ngā ākoranga o te ao matihiko. Ko tā te kaupapa nei  e whakakotahi ai i te oranga wairua, i te oranga tinana hoki o te tamaiti kia eke ai ia ki ngā taumata tiketike o tōna ao.

E kawea ana a Mauri Oho e ngā kura 16, otirā 152 ngā ākonga ka tautokona e te hōtaka nei.

Kia tika a Mauri Oho;

  • Me kaha tautoko ngā rangatira o ngā kura i te whakaurutanga o te hōtaka nei
  • Me whai kaiako e rite ana ki te panoni i ā rātau āhuatanga whakaako
  • Me whai hono pakari rawa ki te ipurangi
  • Me whai rauemi pūrere hei whakamahinga mā te ākonga (he mea nui tēnei)

He kōrero tautoko:

He tino harikoa ahau i te wā i whiwhi ai ahau i taku ī-papa. I tīmata ahau ki te aro ki aku mahi, ki te āta whakaaro hoki, i nāianei e tau ana taku haere.  Ko taku whāinga kia harikoa  taku whānau ki ahau, ā, ko te haere ki te whare wānanga.

Ākonga, Hōngongoi 2015

Ki ōku whakaaro kua kaha ake ā māua nei tamariki ki te whakamahi i ngā rautaki ā-hinengaro, i ngā pūkenga whakatika raru, i te mahi tahi hoki kia pai ai te ako.  E rata ana tā māua tamāhine ki  te mahi i te kaupapa Mauri Oho i te kāinga, ā, he koanga ngākau ki te kite i ngā hua.

Whānau, Hōngongoi 2015

Kei te whai hua ā māua nei tamariki nā te whakahaere i a rātau ake akoranga. E pārekareka ana hoki ki a rātau ka whai wāhi atu ki ngā whakaritenga e pā ana ki te Mauri Oho, Mauri Tau. Ka  rawe hoki ki ngā tamariki te tukanga kōwhiri ngohe mō Mauri Oho, nā konā e tū rangatira ai rātau,ka mutu, e hiahia hoki ana ki te mahi. Ka hikaka rātou ki te mahi ka kitea ake ana ngā tohu whetū ka riro inā tutuki i a rātau ngā mahi.

Kaiako, Whiringa-ā-nuku 2015

Mō ētehi atu kōrero īmēra mai ki a support@kiaatamai.org