Mauri Tau

He hōtaka a Mauri Tau e whakamahi ana i tētahi hangarau pūtaiao hinengaro, e kīia nei ko Opzone, ko tā Opzone mahi ko te āwhina i te ākonga ki te aro ki tōna oranga ā-hinengaro, ki tōna oranga ā-tinana hoki. Ka whakamau i-kini ki te hoi taringa, ā, ka tūhonotia te i-kini ki te rorohiko anō hoki. Ka inehia te āhua o te tinana e te pūmanawa rorohiko mā te pānui me te tātari i ngā pātukitukitanga o te manawa. Ka puritia ngā kitenga mō te  ākonga ki tētahi i-kōpaki motuhake, ā, tāria te wā ka kite hoki i ngā piki me ngā heke o te oranga tinana o te tamaiti. He tukanga tēnei hei āwhina i te ākonga ki te ine, ki te mōhio, ki te āta whai hoki i tōna ake pito ako kia eke panuku ai ia i roto i āna mahi. Ko tētahi anō taha o te hōtaka o Mauri Tau ko te whakaakongia ētahi ngohe whakahāhā hōhonu kia tau ai te āhua o te tamaiti. Mā ēnei mahi whakapakari hā e mauritau ai, e tika ai te aro, e rite anō hoki ai te ākonga ki te ako.

Ahakoa te mōhiō, te mārama me te mātau o te Kaiako ki āna ākonga i te nuinga o te wā, he wā anō me whai awhina tonu ia ki te kimi i te oranga e tika ana mo ia ākonga. Ko Mauri Tau tētahi kaupapa hei āwhina i te kaiako ki te kite i ngā rerekētanga o ngā āhuatanga o ngā tamariki, ka mutu, me pēhea hoki te āwhina.

Hei tauira: Ahakoa e harikoa ana te tamaiti, ā, e whai kaha ana hoki, tērā pea koia hoki tērā e kore e mōhio me pēhea te whakatau i a ia, ā, ka katakata, ka hianga, ka tākaro haere kāore e aro ki te mahi.

Hei tauira anō, tērā pea  e taumaha ana tētahi ākonga engari ka nohopuku ia, he uaua pea ki a ia te aro me te mārama i ngā kōrero hou, heoi anō ko te rongoā noa ko te kai, ko te wai me te whakatā kātahi ka reri ia ki te akoako.

Haramai tētahi āhua miharo mehemea e tino mārama ana te tangata ki ngā tohu mō tōna tinana, pēnei i te mōhio ki te taki o tōna manawa, i te mōhio ki ngā urupare ā-tinana ki ngā whakaaro, ki ngā kare ā-roto hoki, me te whakaawetanga me te pānga ki te taki o tana manawa. Ki te mōhio te ākonga ki ēnei āhua e taea ai e ia te whai huarahi hei whakatau i a ia. Ka āwhina te hōtaka Mauri Tau i ngā kaiako ki te tautoko i ngā ākonga kia tika.

 


Introducing Mauri Tau from Kia Ata Mai on Vimeo.


He Kōrero Tautoko

E rata ana ahau ki a Mauri Tau i te mea he pai mo tō hinengaro. E āhei ana ahau ki te āta aro ki ngā mea katoa ka akona e au.  He mahi koakoa hoki, ā, ka mahia e mātou te ngohe whakamātau hā i ngā wā katoa.

Ākonga, Hōngongoi 2015

I ēnei rā tonu kua kite ake ahau e mauritau ana te noho o taku tama. Ka whakamahia e ia ngā rautaki whakaputa hā. Kua kite ahau i a ia e mahi ana.

Whānau, Hōngongoi 2015

Ka tino kite, ka rongo hoki i te oranga wairua, i te oranga tinana o ngā tamariki , ka mutu kua mauritau te noho. He aha i pērā ai? I te mea kua mōhio rātou me pēhea te whakahaere i a rātou anō.

Kaiako, Hōngongoi 2015

Mō ētahi atu kōrero īmēra mai ki a support@kiaatamai.org