Ngā Hua i Puta

I whakatārewahia te hōtaka Mauri Oho e Kia Ata Mai i te tau 2015 nō muri mai i te whakamātautanga tuatahi i te wāhanga 4, i te tau 2014.

I runga anō i te take he hōtaka akopū tēnei e rua ōna kanohi: Ko te aro ki te kaupapa ka tahi, ka rua ko te kauneke whakamua o te tamaiti.

Te whakapiki i te ara ako ā-matihiko

Kua kite ake ko te mahi tahi o te ipapa me Mauri Oho tētahi ara e manawareka mai ai ngā kura he tauhou ki te taiao hangarau otirā ki tēnei momo akoako.

Ko te kura e kaha ana ki te takiuru ki Mauri Oho ia rā, ia rā,  ko tērā e tawhiti ana te noho. Ahakoa ngā piki me ngā heke o te ako ā-ipurangi ki ētahi, i rere tonu te kaupapa nā runga i te hinengaro koi, i te manawanui me te ūpoko pakaru.

He miharo ngā tataritanga o tata nei o ngā tatauranga arotanga e whakaatu mai ana i ētahi ia ohorere mō Mauri Oho.

  • I tua atu i ngā kura hou ki te kaupapa, kei te kite ake hoki e piri pūmau tonu ana ērā o ngā kura mai i te whakamātautanga tuatahi,
  • E kitea ana kei te tau haere rātou ki ngā whakamahinga o Mauri Oho.  
  • Hei tā ngā kaiako kua tau mai anō te ngākau matangareka me te ngākau tōmina ki te mātauranga, mā  rātau, mā ngā ākonga anō hoki.
  • Kei te takawhīwhiwhi haere ngā kaupapa ako nā te wāia haeretanga o ngā ākonga me ngā kaiako hoki ki ngā huarahi ako e taea ai mā te ako ā-matihiko.

Kapohia ngā painga o ngā ao e rua

Ehara i te mea he ngāwari noa te whakawhiti mai i te akomanga whai pepa ki te akomanga matihiko, ehara hoki i te mea he pai ake tētahi i tētahi heoi, kei te whakatinanahia mai tētahi o ō mātou kura e haere ngātahi kē ana.

Kua kitea e mātou ētahi tauira whakahirahira e whakaatu mai ai i te whakawhiti o  te ako matihiko ki te ako ā-ringa, ka mutu, rite tonu ana te hihiko o ngā mahi ā-ringa ki ngā mahi ā-matihiko.

Kia whakatinanahia tonuhia te mātāpono matua o Mauri Oho kia whakaritea ngā ngohe e aro pū ana ki ngā āhuatanga ako a tēnā ākonga, a tēnā ākonga, kua waihangahia e tētahi o ā mātou kaiako he tauira ipurangikore o ētahi o ngā ngohe ka mutu kua panonihia hei ngohe pārekareka mā ngā ākonga. Nō reira, ahakoa karekau pea he hononga ipurangi e taea tonu ana e te ākonga te mahi i ngā kaupapa Mauri Oho.


Ngā kōrero tautoko – Mauri Oho

He tino harikoa ahau i te wā i whiwhi ai ahau i taku ī-papa. I tīmata ahau ki te aro ki aku mahi, ki te āta whakaaro hoki, i nāianei e tau ana taku haere.  Ko taku whāinga kia harikoa  taku whānau ki ahau, ā, ko te haere ki te whare wānanga.

Ākonga, Hōngongoi 2015

Ki ōku whakaaro kua kaha ake ā māua nei tamariki ki te whakamahi i ngā rautaki ā-hinengaro, i ngā pūkenga whakatika raru, i te mahi tahi hoki kia pai ai te ako.  E rata ana tā māua tamāhine ki  te mahi i te kaupapa Mauri Oho i te kāinga, ā, he koanga ngākau ki te kite i ngā hua.

Whānau, Hōngongoi 2015

Kei te whai hua ā māua nei tamariki nā te whakahaere i a rātau ake akoranga. E pārekareka ana hoki ki a rātau ka whai wāhi atu ki ngā whakaritenga e pā ana ki te Mauri Oho, Mauri Tau. Ka  rawe hoki ki ngā tamariki te tukanga kōwhiri ngohe mō Mauri Oho, nā konā e tū rangatira ai rātau, ka mutu, e hiahia hoki ana ki te mahi. Ka hikaka rātou ki te mahi ka kitea ake ana ngā tohu whetū ka riro inā tutuki i a rātau ngā mahi.

Kaiako, Whiringa-ā-nuku 2015


I whakatārewahia a Mauri Tau i ngā kura ka tautokona e Kia Ata mai  i te wāhanga 4, i te tau 2014. Ko tā Mauri Tau he whakamahi i tētahi pūmanawa rorohiko e kīia nei ko Opzone, ko tā Opzone mahi he āwhina i ngā ākonga kia mōhio ai rātau ki ngā āhuatanga ake o ō rātau hinengaro me ō rātou tinana. Ka mōhio te pūmanawa rorohiko nei ki te āhuatanga o roto o te tinana mā te mātai me te wetewete i te pātukituki o te manawa. Mā tēnei huarahi e taea ai e te ākonga te ine, te mōhio, me te āta whai i tōna ake pito ako hei āwhina i a ia kia eke panuku i roto i āna mahi.


He Kōrero Tautoko – Mauri Tau

E rata ana ki ahau a Mauri Tau i te mea he pai mo tō hinengaro. E āhei ana ahau ki te āta aro ki ngā mea katoa ka akona e au.  He mahi koakoa hoki, ā, ka whakamātauhia te ine hā i ngā wā katoa.

Ākonga, Hōngongoi 2015

I ēnei rā tonu kua kite ake ahau e mauritau ana te noho o taku tama. Ka whakamahia e ia ngā rautaki whakaputa hā. Kua kite ahau i a ia e mahi ana.

Whānau, Hōngongoi 2015

Ka tino kite, ka rongo hoki i te oranga wairua, i te oranga tinana o ngā tamariki , ka mutu kua mauritau te noho. He aha i pērā ai? I te mea kua mōhio rātou me pēhea te whakahaere i a rātou anō.

Kaiako, Hōngongoi 2015