Iwi:
Hauraki, Maniapoto, Te Rarawa, Waikato.
Tūnga:
Ngā Hangarau Whakamōhiohio me ngā Hangarau Whakawhitiwhiti.
Aronga:
Mātauranga Matihiko, Te Whakarite Hangarau, He Kaitautoko Hangarau.
Tirohanga Whanui o Te Kaupapa Ako Whakapakari:
Ki ahau nei ko te whakamahi i ngā rawa hangarau hei whakapiki ake i te kounga o te whakaako te kaupapa matua. Nō ngā tau 1990 ahau i tīmata ai ki te tautoko i ētahi kura ki ngā āhuatanga hangarau, ā, he maha ngā rerekētanga kua kitea i roto i te wā nei.
Ko ētahi o ngā kaupapa tuatahi ake i taku tīmatanga ko te whakarite i ngā tohutō ki te papa patopato o te rorohiko o te hekeretari. I reira ahau i te wā ka whiwhi ngā kura i ā rātau rorohiko tuatahi, ka mutu, he mea hou te ipurangi. Ināianei he ipapa kē ā ngā tamariki – kia whakatauritehia te ipapa ki te rorohiko PC o ngā tau o mua – he autaia kē te ipapa! He huarahi te ipapa kia āhei ai ngā tamariki ki te tūhura me te hanga i ō rātau ake ao mariko mā te kaupapa Mahimaina, he hōtaka matihiko tēnei e āhei ai ngā tamariki ki te tohutohu i ngā karetao hiko, arā anō ētahi atu mahi ka taea.
E āhei ana hoki ngā tamariki ki te whai arotake ina whakamātautauhia e ngā momo pae tukutuku ā-ipurangi pēnei i te: Quizziz, Google Forms me ētahi anō – kāore e kore ko ngā tauira nei he hou ki te taringa. Kua tautoko hoki ahau i ngā kura i te taha whakaako, i te taha whakahaere anō hoki.
Kua whai wāhi ahau ki te āwhina i ngā kura me ngā pūnaha whakahaere rerekē ā-akomanga, ā-ākonga hoki. E kite ana i te whanake haere o ēnei momo hangarau i roto i ngā kura ki te taha aromatawai me te taha whakangungu. He maha ngā taupānga e putaputa ana, ā, e kaha ana ngā kura ki te whai i te ara matihiko kia whai hua ai ngā ākonga. E mōhio pū ana ngā kaiako me pakari ake, me koi ake ō rātau pūkenga, ō rātau mātauranga ki te ao hangarau kia rite rātau ki ngā ākonga o nāianei. Kua kīia ko ngā tamariki o ēnei rā ko ngā tamariki Matihiko.