Te Nīkau™

He ariā Te Nikau nā te mātanga kaiwhakaako nā Cath Rau i whakapuaki ake. Ko ngā mātāpono o Te Nikau e noho ana hei tūāpapa mo ngā kaupapa mahi katoa e riro ai i a Kia Ata Mai. He tohu matua te ariā o Te Nikau e whakamahara ai i a Kia Ata Mai kia noho ko te ākonga me ōna taha akoako katoa kei te mata o te Whakaaro ka whakarite ana i ngā hōtaka.

Ka noho ko te nikau hei huahuatau mō te ākonga.


Te anga Nīkau
Ngā TūāhuatangaTe hāngaitanga ki te ākonga
Te ahurei
He tupu taketake ake te nīkau nō Aotearoa.
E whakaatuhia ana te taketaketanga o te nīkau i te mana ahurei, i te mana tangata, i te mana taketake o te ākonga. He taha anō e tohu ai i te mana nui o te ahurea, o te reo Maori, o te tuakiri anō hoki o te ākonga.
Ngā rawa
He pātaka kai, he whakaruruhau, he rawa
Kia mahara tātau he huhua ngā taha o te nikau, ā, he pērā anō te ākonga he maha ngā rauemi, ngā rawa me ngā huarahi e watea ana ki a ia heoi anō, me tika ngā kōwhiringa kia nui ngā hua ako.
Te urupuia
Ka tupu ā-uru mai
E kitea ana he kaha te tupu o te nīkau ki te tupu ā-uru he pērā anō te ākonga. E kōingo ana te ākonga kia whai wāhi atu ki tētahi hapori manaaki, ka mutu, kia poipoia ia e rātau.
Te kāhiwi
Ka tipu haere te nikau ka ngahoro ngā rau ka mahue mai ko ngā riwhariwha ki te kahiwi.
He rite ngā riwhariwha ki te whakapapa e tohu ana i ngā pūmanawa, i nga momo whakaheke kua whakairohia ki te ngākau o te ākonga. Ka whakaahuahia anō hoki ngā riwhariwha i ngā whanaketanga o te ākonga, waihoki he tohu hoki i ōna wheako ō mua me te whakaawetanga ki runga i a ia.
Te kōpuku
Ko te kōpuku te wāhi e puta mai ai ngā rau
Ko te ariā o te kōpuku he whakaahua i ngā tāngata, i ngā rōpū (kaiako, hoa, ā wai ake,) e whai wāhi ai ki ngā akoranga me ngā wheako o te ākonga, heoi anō ko te whānau tonu kei te pito o te ao o te ākonga haere ake nei, haere ake nei. Tērā ētahi o ngā tāngata
he whakaawetanga rangitahi noa ō rātau i te ao o te ākonga ā, ā tōna wā ka wehe, he pērā hoki te tupu o ngā rau nikau ka tupu haere nā wai rā ka ngahoro atu.
Ngā tētē, ngā rau
The fronds/leaves
E tohu ana ngā tētē i ngā taha tuatinitini o te ākonga pēnei i tōna ngākau, i ōna tōminatanga, i ōna pūmanawa, i āna huarahi ako, aha noa. Kua tapikihia te raranga o ētahi o ngā āhuatanga nei, ā, he rite tonu ki te tupu tukutuku mai o ngā rau o te nikau.
Ngā hua
The fruit/berries
Ko te hua e tohu ana i te oranga o te ākonga ( ā hinengaro, ā tinana, ā wairua). He pānga anō tō te hua o te nīkau ki te tāiao whānui. Nō reira ki te puāwai te ākonga ka whai huanga te hapū me te hāpori, otirā, ka hua mai he tangata hei painga mō te ao.